#Interview: مع “محمد علاء الدين بن طراد” الفائز بمسابقة Bloommasters أهم مسابقة للمبادرة في تونس

0 214

Bloommasters

«بلوم ماسترز» للشركات التونسية الناشئة، هي مسابقة تم اطلاقها من قبل مؤسسة بنك تونس العربي الدولي للشباب بالشراكة مع منتدى MIT لريادة الأعمال في العالم العربي. تهدف هذه المسابقة الى المساهمة في بناء أسس متينة لتنمية البلاد على الصعيدين الاجتماعي، وتوفير الدعم اللوجستي والمادي للشباب المبتكر حتى يحلق في فضاء ريادة الاعمال.

و سيوفر منظّمو  المسابقة للفائزين فرص الحصول على تدريبات مكثفة مع خبراء متخصصين في مجال الابتكار وريادة الأعمال، وهو ما سيزيد من فرص نجاح مؤسساتهم وتطوير كفاءاتها لمزيد توسيع الاستثمار وتوفير بالتالي اكثر ما يمكن من مواطن الشغل الاضافية للشباب المبتكر.

دورة هذا العام شهدت تتويج 9 مشاريع ناشئة، من بين الفائزين علاء الدين بن طراد و فريقه بمشروع Vsober و الذي تحصّل على المرتبة الأولى من فئة الأفكار الناجحة.

Vsober

هو عبارة على مركز إعادة تأهيل افتراضي يساعد الشباب المدمن على المخدرات على الإقلاع عن الإدمان باستعمال تقنيات الواقع المعزز.

و بهذه المناسبة، تحدثنا في لقاء خاص مع علاء للحديث عن فوز بهذه المسابقة.

*شكونو علاء بن طراد؟

محمد علاء الدين بن طراد، 21 سنة، نقرا Bussines intelligence في ISG و نعمل شوية فريلانس في مجال تطوير المواقع و التطبيقات. عضو و أحد مؤسسي عدّة نوادي في الجامعة كيما نادي راديو ISG، نادي TUNI’SEO ISG، زادا عضو في JCI TUNIS و YTCA.

من أكثر الحاجات إلي نحب نعملها هي نعرف حاجات جديدة و عباد جدد، على خاطر الواحد ينجم يحسن من روحو.. و زادا نحب أي حاجة في مجال التكنولوجيا.

مغروم بارشا بالمسابقات سواء كانت محلية و إلا على المستوى العالمي.. و نشرب بارشا قهوى!!

*كيفاش جات فكرة المشروع؟ و كيفاش بدا ؟

بالنسبة للمشروع إلى أنا فيه، بدا بمسابقة اسمها OPEN STARTUP TUNISIA.. هي عبارة عن مسابقة بين الطلبة التوانسة يتم اختيارهم بعد تقديم طلب مشاركة.. مهمتم يلقاو حلول تكنولوجية للمشاكل الموجودة في نفس الوقت تحقق الأهداف الإنمائية للألفية التابعة للأمم المتحدة.. من هنا كانت البداية، كوّنا فريق وبدينا نخددمو على مشروع Vsober.

*احكيلنا على المراحل إلي عشتهم و مريت بيهم باش وصلت ؟

كيف أي مشروع و إلا startup.. ديما فما الـUP و Down.. نهار تحس روحك باش تولي حاجة كبيرة و نهار تقول “آش مجيبني لهنا و علاش نعمل في هذا الكل”.. لكن الاصرار و التحفيز إلى يجي العباد المقربين و الأصحاب يخلي ديما نخاطر و ندخل في حاجات و تجارب جديدة متعرش شنية النتيجة متاعها في الآخر و إلي خلاني كل مرة تقف على الساقي.. الحكاية بدات بالشوية بالشوية، أول حاجة بديتها هي المشاركة في المسابقات الصغار و الـ hackathons و ربحت أكثر من 10 مسابقات من نوع هذا.. بعد حبيت نقوي شوية، بديت نلوج على مسابقات ما أكبر على المستوى الوطني و العلمي و المنح، لين وصلت لـ OPEN STARTUP TUNISIA و ROBOT SUMO JAPAN في اليابان و أخيرا bloomasters.

* تجربتك مع  BIAT BOOLMMASTERS

مسابقة Bloommasters من أحسن الحاجات إلي عشتهم في حساتي بعد خيبت أمل و عدم تحصلنا على المرتبة الأولى في OST.. كهو بدينا بتعمير الـapplication كالعادة في آخر نهار على خاطر خذات بارشا وقت في التحضير.. بعد مدة وصلنا  email فيه إلى أحنا تقبلنا في أحسن مسابقة في تونس للمشاريع و الشركات الناشئة..أحنا فريق متكون من سلسبيل، سيرين، أيمن و أحلام.. بدينا في الـbootcamp أنا و سلسبيل الثابتي co founder متاع Vsober.. تعلمنا بارشا و قابلنا بارشا موجهين إلي تعلمنا منهم بارشا زادا، و بشوية بشوية و بالخدمة وصلنا في النصف النهائي.. كان نهار طويل لكن في الآخر ترشحنا الحمد لله.. لكن في النهائي المنافسة كانت صعيبة بارشا على خاطر قعدو 10 أفكار و كانت أفكار قوية بارشا و “طيارة”.. عدينا الـpitch و الأسئلة متاع الحكام و قعدنا نستنو في النتيجة.. لحظات صعيبة.. المرتتبة الثالثة طلعت، الثانية.. و في الأخير قالو اسم الفكرة متاعنا في المرتبة الأولى.. و كانت الفرحة!

*الخطوة القادمة ؟

في الخطوة القادمة، العمل على تطوير الفكرة هذي في b@labs.. بالنسبة ليا أنا، كالعادة نخدم و نقرى على روحي باش كل يوم يكون خير مالبارح…

محمد علاء الدين بن تراد

تعليقات
Loading...